Double La-Qanooniyat

"Aj phir apke bete fail hoay hayn". Fazlu ki amma, abba miyan se ek bar phir rona ronay beth gayi theen. Guzishta kayi dafa honay wala waqiya aaj phir ronuma hua tha, Fazal deen urf Fazlu aj phir naween jamaat k parchon mein fail hokar sehen mein kharay abba miyan aur amma k fazitay sun rahay the aur is maharat se ek kaan se sun kar dusray se nikal rahay thay k kaheen kuch bhi un par galti se bhi asar andaz na ho jaye.

Yahee kuch haal deewar milay ghar ka tha farq sirf tha tuo itna tha k wahan amma ki jaga bhi abba thay aur naween jamaat ki jaga dasween k private mein na kamiyabi thi magar yahan kuch ziada pecheeda masla dar paish tha qk Aslam Ahmed urf Asloo k abba sahab ki salawaton ka nateeja kuch yun nikla tha k unhon ne hatman keh dia tha k "Bhaiya buhat hoi ye parhai, tumne kuch na karna ye hum ne dekh lia. Kal se Shafqat ki dukan par bithaye deta hun, chaar paisay kama kar ghar lao" Jispar Asloo buhat barham ho kar ghar se bahar nikal aye thay, raat ko jab fazlu bhi Muhabbat khan k dhabay par aye aur dono ka amna samna hua tou din bhar ki aap beeti ek dusray ko suna di, jiska nateeja ye akhz hua k thay tou dono hi sada k nikammay magar har jaga dedh hoshiyari dikhana tuo jese wirsay me mila tha aur nojawani ka khoon bhi thaatein maar raha tha, parhai se wese hi dil bardashta ho chukay thay tuo ye shafqat ki makenik (mechanic) ki dukan par kaam karna apne liye farar ka rasta jaana aur Asloo k saath saath Fazloo ne bhi ghar par akar parhai se la-taluqi ka ailan kar k nokri ki baat kardi..

Aglay chand roz mein Shafqat ki dukan par kaam shuru kardiya, kaam ata tuo tha nahi tuo seekhtay sikhatay saal do saal lag gaye aur ab jab kaam seekh gaye tuo is kaam se bhi dil uktanay laga, Shafqat sirf doston k bachay honay ki khatir dono ka laubali-pann aur laparwahiyan chupata raha magar akhir wo bhi karta tuo kahan tak karta, hua wahi jiska dar tha tanqa katnay lagi jispar buhat moo mari hui magar Shafqat ne dono ki ek na suni, sunta bhi kyun uska apna ghar tha jisay wo isi zariye chalata tha..

Ghar par ab pehle se kum paisa lanay par tanay aur malamat shuru ho chuki thi jis k nateejay mein kafi moo mari ho jaya karti thi, Asloo k abba ne tuo saaf taur par keh dia tha k apna kiya khud bhugto aur apne malik ko khud manao me na madad karnay ka..

Tanqa mein katoti se dono ko ab nokri khalnay lagi, Asloo ka dhabay par ek din bethay bethay shetani charqa ghooma jisay usne dimagh naam de rakha tha k ab hum chori chakari shuru kartay hain, mulk mein la qanooniyat tuo wese hi aam hay aur is me pakar bhi kahan hoti hay, apne ilaqay ka thaana bhi kesa hay sub jantay hain ek raat se ziada na rakhainge agar kuch buhat bura ho bhi gaya tuo magar Fazlu me zara kum umri k bais jhijak thi magar kese tese usney bhi haami bharli..

Nokri ki kamayi se ek naqli bandooq khareedi gayi jissay daranay ka amal samnay aana tha, aaj wo jo kaam karnay jarahay thay wo buhat mansooba bandi k saath tayy paya tha, Gali k konay par Ajmal rehta tha ussay 2 ghantay k liye motor cycle lekar unhay qareeb me hi ek maidan k barabar wali gali mein apni karwayi karni thi aur ye sub marhala din mein hona tha k wo gali din k auqat me sunsan hoti hai, khaer Asloo agay aur Fazlu peechay behtay apne jurm ko murtakib karney motor cycle par chal diye, door se aata ek larka dikhayi de diya tha jo hand free kano me lagaye aur mobile me magan tha, 10 feet ki doori par Fazlu sahab ki himmat jawab de gayi aur wo us muqaam per utray hi na aur wo larka bhi guzar gaya aur sahab ye dono bhi, ghar puhanchtay puhanchtay Asloo ki jo galiyon ki barish Fazlu par hui wo la bayan hay..

Ek haftay baad phir buhat planning k saath yehi kaam karna maqsood tha k ab ki dafa Fazlu motor cycle chalaye ga aur Asloo utar kar karwayi karay ga jab k Fazlu agay uska intizar karay ga aur Asloo jis se mobile cheenay ga usay neem behosh karega bandooq sir par maar kar takay apni jhijak nikal jaye, aur unka safar isi isnaa mein shuru hogaya magar aj qismat ko kuch aur hi manzoor tha aaj na tuo koi shikar mila aur na hi kisi qism ki karwayi ho paai jispar dono ne is nakami ka sehra ek dusray k sir bandhna sahi jana..

Aaj Ajmal ko kaheen kaam se jana tha jiski waja se aaj motor cycle na mili tuo paidal janay ka irada kiya, Shafqat ki dukaan par har haftay ek din ki chuti se tang akar usnay dono k abba ko bula liya tha aur unhain keh dia tha k bhaiya aapki hamdardi mein mene in dono ko kaam par rakha tha magar ye koi tareeqa nahi is lie aaj hi in dono ko me nokri se farigh karta hun jispar buhat gussay me wo ghar lotay thay, udhar dono apne mission par aaj paidal nikal gaye thay, door se ata ek aur kum umr larka apne haath mein mobile liye honay walay hadsay se be khabar inki janib araha tha aur ye ek dusray ko dekhtay aur himmat bandhaatay uski taraf, abhi koi 18 se 20 feet ki doori par thay dono k peechay se ek motor cycle par sawar do na maloom larkay in ke paas aye aur kehtay hain "Nikalo jo kuch hay" ye dono hawas bakhta ek dusray ko dekhtay huay kehtay hain "kuch nahi hay" udhar se sakht lehjay mein ek aur jumla kaha gaya "Abay nikal k de jo hay warna nikalun?"
Akhri kamai hui raqam aur dono k mobile phone lekar wo dono na maloom larkay ye jaa wo jaa chaltay banay aur yahan Asloo, Fazlu ki aur Fazlu, Asloo ki shakal dekhta reh gaya..